هذه حديثة لقديمة .. أتمنى أن تعجبكم ..

هذه حديثة لقديمة .. أتمنى أن تعجبكم ..
----------------------------

سمعــوا هالقصيـدة وافهمـوا زين = وشوفـوا صبــر اهـل لـول الطيبيـن

تحجـي لكـم أم نـادر هلحجايات = تعلمكـم عن العصـر الـذي فـــات
حجـايـات النســـاء والأوليــــات = يبنتـي اتونـــسي ولا تستهمـــين

أظنــش مادريتي بالجرى وصتار = ولا سمعتــي يابتــي عـن هالخبـار
ولا لقتــي علـى النســوان لكبار = ولا سمعتـــي أحــاديـث القديمـــين

عــــادات الأوائـــل دفهميـهـــا = يخطبـــوا البنـــت ويسلمــــوا ليهــــــا
وتتقبـــل اللــي يجيبـــوا اليها = ولا تشــرط بشقــــة مثـــــل الحـــــين

ايدخلـــون الولـــد في حجــرة أمـه = لو عنــد عمتـــه لـو بيـــت عمـــــه
ولا للولـــد عنـــد الأهـــل كلمـــــة = مايقـدر يقــول هالشـي مهـو زيـــــــن

وامـا الفتــــاة ليلـــــة دخلتهــا = ايجيبـــوا لهـا مــرا اتزبــط قصتهـــا
اتعدلهـــا وتلبسهــــا زينتهــــــا = اتعطــرهــا ابعطـــر الفاخـــر الزيــن

ما يجيـبــوا لهـــا مـن الأجانــــــب= لا قــص شعـر لا حــف الحواجـــــب
ولا يعدلونهـــا غـــير الحبــــــايب = وكلهــا امبختــره بالمشمـــر الزيـــــن

ايلبسوهـــا الــزري أشكال والـوان = ويخلوهـــا مثـــل وردة البستـــان
وبيهــا حافــة جملـــــة الجـيــــران = عدوتهـــا اتعودهـــا مـن العــــين

اذا مـن ارسلـــوا المرســول ليهـــا = ايطلعــــون الحبايـــــب حافيهـــا
وكــل انسابهـــــا متحاوليهـــــــــــا = وعليهــا اردى اناجــر من الطيبــــين

وكل أهـــل الفريــق تمشـي وراها = وهي متسـتـرة وماحـــــد يراهـا
وعمتهـــا وخالتهـــــا معاهــــا = ايعوذوهـــا عــن أعيــون الشياطـــين

وامــا الـــذي تاخـــــذ العيلــــه = يعطـوهـــــا حـــاجــــات القليــلــــــــه
وطـول انهـار متلوتــه بالشيلــــــه = ولا تجــرع تلــبس مشمــر الزيـــــــن

واذا زعلـت الوحــده ويـا رجلهـــا = العمـــه والحمــــاه يقولــــون خلهــــــا
خلهــا تنجــب في بيـــت اهلهــــــا = والعـــم يقــول طلقهـــا مــن الحــــــين

اووحــده اتقـــول ما نبغــي قربهـا = اووحـــده اتقـــول اسليمــــه اتجبهـــا
خطـبوا لـه مــرا وحـرقـوا قلبهـــا = وبـدال العــرس عرســوه عرســين

ايخلــون المـرا تمشـي ابقهرهــا = وحتـى لـو هــي حامــل فـي شهـرهـا
ايقولــون للرجــل لا تجيب خبرها = وبـدال المـــرا ابنعطيــــك ثنتـيــــن

استـاده للحوامــه والتلابـيـــس = واستـاده لروحــــة المعـاريــــس
ومن تحضـر حضـر وياهـا ابلـيس = ماهي قابلـــه منــا حجــــي الزيــن

واما الـذي امـن اعيالهــا اتخـاف = ايخلوهـــا تشــــوي سمـــج لجــــواف
وذك البيـت من الدخـان ماينشـاف = والعمــه جنهـــا بـت السـلاطـــــين

والعـم يقـول هالقهتوة اقلبهــا = ولمـــي هالفوانــيس ومششيهــــا
وعدليهــا وحطـــي كـاز فيهــا = وقعدي حارسينــا انجــي مـن العــين

غذانــا الـيــــوم ابـــدا مـا لــه دوق = واما السمــــج سويتيــــه محـــروق
حطيتـه وشـفــت الشلبـه مـن فـوق = واما العـــيش ليـــن يشبـــه الطـــين

اوحـده اتقـول اللحمـه مـا غلتهــا = وحمصــة البصــل مــا غمقتهـــا
عفر مستعجلــة علـى بيـت ختهـــا = جنهـــا غـابــه عنهــــم مـن اسنــين

اذا اتنفـر الغـــذا مـن عنــــدها = اتحـــط الحرايــــق فــي ولـدهـــــا
تمشـي ودمعتهــا اعلـى خـدهــا = وتقـــول اجيـــب العيــش مـن ويـــــن

اذا انكســرت مـن عندهـــا الجـره = تتجــيرم ولا تدخــل الحجـــره
وكـل مـن يجـي يعطيهــا زبـــــره = وامـا الرجـــل يعطيهـــا جمعــــين

الوحـده لـين راحــت بيـت ابوهـــا = من تجـــي لعيــــال يضـاربوهــــا
يقولـوا اتفرغــت من بيــت ابوهــا = هيمتهـــا من غبشــه إلــى الحــين

والعـم ايوصــي علـى اوليـــــــــده = باجـر خلهـــــا اتســــــوي عصيــده
وتحطهــا في ميمجـــه الجــــــديده = وتغطيهــا لــين اجــي امــن العــــين

قـــول ليهـا لا تسويهــا لينــه = وتتلفــــت ولا اتديــع الدهنــه
ولا اتخلـي أحـــد ليهـــا ايتدنـى = وتعطـي اولادهـا يقحصــوا المواعين

امــا الــذي تاخــــذ الفــلاح= طول النهــار من الخدمــه ماترتـاح
حتـى لـو ولدهـا من العطش صاح = اتخليـــه يتدحـــن فــي الاراضــين

طـول انهــار اتروي باربع اجـرار = ترقــط النخيــل وتجنـــي الاشجــار
وحميهـا ايقـول روحي حني لحمار = حنينــاه ولكـــن ماصبــــغ زيــن

عمهـا ايقول بكــري النارجيلـه = وبــرزي المرحلــــه تحــت الفسيلــه
وعشـرة اظـروف خيطيهـــم الليله = وجــــان تتمكنـي كملي العشــرين

خصوصـا من يصـير العم شايــب = ورجلهــا امــن الصبــح لليـــل غايـب
يخلـوهـــا اتــودي للرواتــب = على الراس اربعــه وفـوق ايدها اثنين

يقولــوا لــين جـــت نقــشي القلـــه = وبـرزي اشويـــه التمـــره فـي سلـــه
وطلعــي للغــدا اشويــه احلـــــــى = ونفعــي البقــره وغسلـــي المواعـــين

وبرزي المرفعـه وبرزي المكيـال = وغسلــي هالســراريـــد ويّـا لســلال
وشيلي اثياب عمش عن هالحبــال = وفرشـي في الفدا سمّـــه وخصـــيرين

اوروحـي غسلـي السفــره وتعالـي = اوجيبــي امــن الفـدا عــدوق الهلالـي
وخلـي السعـف تكســيره لتالـــي = اوبلـي الخــوص وسفــي هالزبيلــــين

وشوفـي في العريش العقب مرمي = ودقــي الهيـــــل والقهـــــوة وخمــــي
وجيبي شيلتـــي بـــاروح اسمــي = وترســي كيتلــي عميـش مـن العــــين

وروحـي الى حماتــش عاونيهــا = وبتهـا امصخنـــه روحـــي اخذيهـــــا
اوفلقــي الكـرب والتلــه اليهـــا = ولمي اثيابهـا وروحــي بهـــم العـــين

لكن لا تحاجــي مرت حميهـــا = تــرى هــي حاطـــه لعنـــــاد ليهـــا
بالمخصــوص يـوم اللــي عليهــا = اتعـانـدهـــا وتخـشـــش المـواعـــين

وعين اعمــاد تحـرق ديـك القـدور = ولا اتشيـــل الطفـــو وتخـــم التنــــور
على كـبر المكــان الخـوص منثور = والقــدور ابمغاطيهــــا امقرفـــين

وتخـش البصـل والفلفـل ولصبـــار = وحتى الملـح اتخشــه داخـــل الـنـــار
يـوم اللي عليهـــا بتــي تحتــــار = قفيف العيـــش اربعهــــم امقطنـــــين

بتـي صـابــره والكــــل يحبهـــا = تنــام ابجوعهــــا اومــــادري ابهــا
كـل شــي امخليتنـــه في قلبهـــا= حتـى أهــل الفريــق منهــا متعجـــبين

بتي مالهــا فـي القـيــل والقـــال = من حــظ الرجــل وحـــظ لعيــــال
ناس احظوظهـــا اتفلــتق للجبـال = يلوفــوا علـى مـرا تربــات طيــبــــين

بتي شاطـــره ماناعتــــه الهـــا = والله ابـــــزود عمتهـــــا ورجلهـــــا
بـس ماتنفتــق الحاجـــة تشلهــا = وابزار اليــــوم اتقسمــه ليومـــين

صـار اخضـــر قــدم بتــي عليهــم = جـــرت ذيلهــا بالخــــير ليهــــــم
حظهــم فقــب من دشــت عليهــــم = بـدال البيـــت ســــووا ليهـــم اثنـيـــن

اقديماتهـــا على اعيالهـــا نديـــه = حطــوا البلبلـــــه وســــدوا الرجيــــه
ويجيبــوا الهجــور كـل مغربيــــه = كسوهـم هالسنــة كــل شــي بلثــنـــين

من دشــت عليهــم قامــت بيـــــوم = فقيلــه وصايمــــه ماتقـــدر اتقـــــــوم
تطبــخ الغــدا والخشــم مصمــــوم = عــدال امزاجهــــا بتشيشــــة الطـــين

والله ابنيتـــي ماحـــد صـــبرهـــــا = تمشــي وبيدهــــا امجـــوده ظهرهـــا
اني امهــا مادري متـى شهرهـــــا = بغيتـي اتصدقــي لــو مـــا تصدقــــين

حماتــش ضيعـــت قرنفلتهـــــا = يمكـن خمـــت الـــدار ورمتهـــــــــــا
رجلهــا ايقــول الخزامــه توتهــــا = خسـاره امقمشـــه مـن مشخص الزين

تراكيهــا خســاره ضيعتهــــــــم = ولـــزرارات كلهـــــم كسرتهــــم
وأوراق المريــه فشختهــــم =وخنصرها نبص من عندها في العين

عرسهــا ماشــي ليهــا ما أخذتــــه = صنـــدوق وســرير سلـــه وتختــــــه
اردي بَرْوَجــــي وثوبــين بُتـَّــــــه = ملافع والسراوله شغـــل البحــــــرين

اخذنــا دوشكَــين واربـع مسانـــــد = انهيليــين وياهـــــم مواســـــــد
اردي ترملــي والحـــاف واحـــــد = طشت وابريق بغدادي من الزيــــــــن

أخذت ليهــا الميامـــج والغضـــاير = دراريـع اربعـــه وخمســـة مشامــــر
وأبوها جـاب ليهـا ســت مناظـــــر = وخنجــه امعبيــه كلهــا مـن الصــين

وحتى المرطبــان أخــذت اليهـــــا = وقفـة مكحلـــه وصيــــت ليهـــــا
وابوهـا بعـد مـا قصــر عليهـــــــا = كل شيء جاب ليهـــا مـــن البحـــرين

مديـد اربـع وسجــاده واوصايــــه = وسفــره امنقـّشـــه نْقــــوة الدايـــــــــه
والله اتعنــت اليهــم اعنايـــه = وجابـــت الفــروك ومحلــب الزيــــن

شـرت ليهـا القهــرب والمعاضض = نقـت ليهـــا المباخــــر والملافـــــض
يـس هـي علـى الحاجـه ما تحافـظ = تمشــي امشولعـــه مشيـــة مجانيـــــن

ابوها جـاب ليهــا خمســة اثـيـاب = وبــرده للســـرير وبــرده للـبـــاب
وجاب الودج والديـرم ولخضـــاب = وبابوجــين روغـان مـن الطيبـــــين

أخـذت ليهــا الغــوري والبيـالات = واثناعشـر مــتر حـق السناحـــات
وبـرده للمسبــح شغــل سيهــات = وحتى مصخنتها مـن اصفــر الزيــــن

انـي مـا شفــت وحــده مثـل بتــي = والله لــو تشوفيهـا اعتجبــــي
وجيفــه يلسمعتـــي ماضحكــي = اشتقتـــي الـــى كـــلام الاولــين

وهـذي آخــر القصــه ياحضــــار = وصلوا على النبي الهـــادي المختــار
وبـن عمـه علـي حيـــدر الكــــرار = والزهـــراء والسـادات الميامـين

وشكر الله مـن الواجـب علينـــا = بفضلــه ومنتــــه أنعــــم علينــــا
تساوينـا وصرنـا ابعيشـه زينـه = وأعظمهــا علينـــا نعمــة الديــن

*****************************

شبكة العراق المجروح

تحــ حور العين ــــياتي